ال60 سنة التي يعيشها المصري في مصر يعادلوا حرفياً 20 سنة فى أي دولة خارج مصر

من المفارقات العجيبة في بلد العجايب 

الـــــ 60 سنة التي  يعيشها المصري في مصر يعادلوا حرفياً 20 سنة فى أي دولة خارج مصر 

بمعنى…

الغساله دي 

تمن الغساله دي 19000 جنيه... 

يعني حوالي 4 أضعاف مرتب شاب من فئة المفروض المجتمع معتبرها مؤهل عالي و أنه من علية القوم خوالي  ( 5000 ) جنيه. 

 اللي مش حلو في الموضوع ، هو عمر الشاب ده  فيه كام غساله و كام تلاجه ، ده عمره كله ممكن يضيعه في عربيه تمنها 200 الف جنيه . 

في حين إن نفس الشاب لو خرج من بوابة الزمن ( بوابة المطار) ، هيقطع سنين ضوئيه من عمره، وتتحول  الغساله دي لسعر مختلف تماماً ، لو أن مرتبه بره ما يعادل 1000 دولار مثلا يعني. 

و الغساله دي لم و لن تتخطي 200:300 دولار أي =عمل حوالي أسبوع واحد فقط . 

إذن نظرياً ، ف السفر عبر بوابة مطار القاهره الزمنيه ،  إختصر  12 اسبوع عمل لأسبوع واحد فقط ، لنفس ذات الشاب ، لكن في دولة تانيه  . 

التفسير ل ده ، هو إن إحنا وقعنا في حقل مغناطيسي ، الزمن بيقف عندنا بنفضل نشتغل سنين و سنين علشان نجيب ولا حاجه ، وحتي لما تحوش تمن الحاجه تلاقي سعرها زاد ، وتفضل تجري وراء السعر عمرك كله لغاية ما يتقطع نفسك وتفشل أو عمرك يخلص.

اليوم في مصر بيعدي بقيمة 12يوم  ، و الزمن بيقف عند الفقراء ، أيوه الفقراء ، لأنهم لا  يمتلكون الحياه  فهم ليسوا في تعداد الزمن بل هم في بعد و جودي خامس .

أحنا كده يا جماعه مع الوقت و مع السنين اللي جايه ، لو فضل معدل الدولار يزيد كده

يبقى أحنا بنشتغل و بنتعب بأزيد بكتير أوي من الى بنحصل عليه  .

يعنى بعد كده شغل يوم بره فى أي دولة، هيساوي شغل شهر فى مصر، وتبدأ الفروق الزمنية تبعد أكتر وأكتر .

يعنى أنت مثلا علشان تجيب غسالة زى دى فى مصر محتاج تشتغل 4 شهور ده لو مرتبك 5000 جنيه 

و لو اشتغلت بره علشان تجيب الشغاله دى مش هتكمل نصف شهر

يعنى الـــــ 60 سنة الى بنعشهم فى حياتنا فى مصر= 20 سنة بره فى اى دولة.

المقصود هنا هو غلاء الاسعار اللي في مصر ما بين جمارك وضريبة قيمة مضافة وربح تاجر وربح وسيط وسماسرة ، علشان في الاخر تدفع في الحاجه اضعاف اضعاف امنها الحقيقي ، اللي طالعه من مصنعها بيه.

حاليًا فى بيوت فعلا مش عارفه تجيب الــ 3 وجبات بتوع اليوم.

^^و فى جوازات باظت بسبب الغلاء الى حصل ، و فى ناس كانت مديه مواعيد و الوقت عدى ، بسبب الغلاء من مواد تشطيب و عمال و اجهزة. 

طيب لو واحد بيشتغل و بيحاول يحوش جزء معين.

مثلا حوش 20000 جنيه على ما يحوشهم و ينزل يجيب بيهم حاجة هيلاقيهم مش جايبين نصف الحاجة الى كان بيحوش علشان يشتريها أصلا واللي سعرها ارتفع واصبح مضطر يحوش تاني ويقضي عمره تحويش تاني ، في حلقة مالهاش ملامح ولا باين ليها نهايه.

ياترى كم بلد يعاني ما تعاني منه مصر!!!